នៅតាមសាលារៀនគោលដៅគម្រោងរបស់អង្គការ ខេប នាពេលបច្ចុប្បន្ន គម្រោងទាំងអស់មានការគាំទ្រខ្លាំង និងតម្រូវឱ្យធ្វើការផ្សព្វផ្សាយទៅកាន់សហគមន៍មូលដ្ឋានទូទាំងប្រទេស និងពិភពលោកបានស្គាល់ និងដឹងឭតាមការបង្ហាញសកម្មភាពជារូបភាព និងវីដេអូ។ ឆ្លើយតបនឹងតម្រូវការនេះ ម្រោងកុមារកម្ពុជារីករាយបានរៀបចំវគ្គបណ្តុះបណ្តាលស្តីពី ការថតរូប និងកាត់តវីដេអូ​ ក្រោមការសម្របសម្រួលពីលោក អឿ សាវីន មន្ត្រីទំនាក់ទំនងជាន់ខ្ពស់របស់អង្គការ ខេប។ កម្មវិធីនេះបានរៀបចំធ្វើឡើងនៅសាលាបឋមសិក្សាឈើខ្លឹមក្នុងខេត្តត្បូងឃ្មុំ​ ដោយមានសិក្ខាកាមសរុបចំនួន២២ នាក់ ជាគ្រូបង្រៀនមកពីសាលាបឋមសិក្សាឈើខ្លឹម លោ និងថ្មទទឹង ក្នុងការស្វែងយល់ពីរបៀបថតរូបភាព និងកាត់តវីដេអូដើម្បីពង្រឹងប្រើប្រាស់រូបភាពក្នុងការផ្សព្វផ្សាយសកម្មភាពអភិវឌ្ឍន៍សាលារៀន។

វគ្គបណ្តុះបណ្តាលនេះ បានផ្តល់នូវចំណេះដឹងដល់សិក្ខាកាមដូចខាងក្រោម៖

-ពង្រឹងអំពីរបៀបកាន់ម៉ាស៊ីនថតរូប និងទូរសព្ទឆ្លាតវៃ ឬថាប្លែតឱ្យបានត្រឹមត្រូវ

-របៀបប្រើប្រាស់មុខងារផ្សេងៗក្នុងម៉ាស៊ីនថតរូប (Camera Digital Function)

-ស្វែងយល់អំពីការចាប់ប្លង់រូបភាព (ពន្លឺ, ផ្ទៃក្រោយរូប, និងចំណុចសំខាន់ៗនៃរូបភា) និងខ្លឹមសារនៃរូបភាពដែលយើងចង់ថត និងផលិតវីដេអូ

-ប្រើប្រាស់កម្មវិធីជំនួយការកែរូបភាពដោយប្រើប្រាស់កម្មវិធី Snapseed

-ចែករំលែកអំពីការប្រើប្រាស់កម្មវិធី CapCut ដើម្បីកាត់តវីដេអូ

-លើកកម្ពស់ការថតរូបសម្រាប់យកទៅប្រើប្រាស់ឱ្យត្រូវនឹងតម្រូវការជាក់ស្តែង ជាពិសេសរបាយការណ៍សាលារៀន និងការពិព័រណ៌ស្នាដៃផ្សេងៗ។

កញ្ញា ហោ កក្កដា ជាគ្រូបង្រៀននៅសាលាបឋមសិក្សាឈើខ្លឹមបានមានប្រសាសន៍ថា "វគ្គបណ្តុះបណ្តាលនេះ ពិតជាល្អណាស់ ពីព្រោះខ្ញុំបានដឹងពី របៀបនៃការចាប់ប្លង់រូបភាពឱ្យបានល្អ ការកាត់តវីដេអូ ជាពិសេសការកែរូបភាពឱ្យបានស្អាត។ ខ្ញុំសូមសំណូមពរដល់គម្រោង សូមឱ្យវគ្គបណ្តុះបណ្តាលនេះលើកក្រោយ មានរយៈពេលវែងជាងនេះ ដើម្បីឱ្យពួកយើងយល់កាន់ច្បាស់ពីការកាត់តវីដេអូ។

សិក្ខាកាមនឹងយកចំណេះដឹងទាំងអស់នេះ ទៅអនុវត្តនៅក្នុងកិច្ចការប្រចាំថ្ងៃ ជាពិសេសការចាប់យកប្លង់ថតរូបភាពល្អៗអំពីសកម្មភាពប្រជុំ សកម្មភាពសិស្សនៅក្នុងថ្នាក់រៀន បរិស្ថានសាលារៀន និងសកម្មភាពបណ្ណាល័យដើម្បីធ្វើការផ្សព្វផ្សាយអំពីសកម្មភាពសាលារៀនជូនដល់សាធារណជន។ ទន្ទឹមនឹងនោះ សិក្ខាកាមក៏បានស្វែងយល់ពីមូលដ្ឋានគ្រឹះអំពីការកាត់តវីដេអូ។ គម្រោងកុមារកម្ពុជារីករាយទទួលបានហិរញ្ញប្បទានពីមូលនិធិគីនចាន៕