ព័ត៌មាន និងព្រឹត្តិការណ៍

សិក្ខាសាលាមួយស្តីពី ភាពជាអ្នកដឹកនាំ និងការគ្រប់គ្រង

Date : 2023-10-16

ការកែលម្អសមត្ថភាពគ្រប់គ្រងដៃគូនៅមូលដ្ឋាន ដើម្បីបង្កើនលទ្ធភាពទទួលបានសេវាអប់រំ និងគុណភាពបង្រៀន និងរៀនជាគោលបំណងដ៏សំខាន់មួយរបស់គម្រោងកុមារកម្ពុជារីករាយ (HCC)។ កាលពីថ្ងៃទី១១-១២ ខែតុលា ឆ្នាំ២០២៣ គម្រោង HCC បានរៀបចំវគ្គសិក្ខាសាលាមួយស្តីពី ភាពជាអ្នកដឹកនាំ និងការគ្រប់គ្រង (វគ្គ១) ជូនដល់នាយក នាយករង លេខា និងមន្ត្រីពាក់ព័ន្ធ។

សិក្ខាសាលានេះត្រូវបានធ្វើឡើងនៅសាលាបឋមសិក្សា អង្គនារាម ស្ថិតក្នុងស្រុកត្បូងឃ្មុំ ខេត្តត្បូងឃ្មុំ ដោយមានគោលបំណងផ្តល់ឱ្យសិក្ខាកាម នូវគន្លឹះសំខាន់ៗដូចខាងក្រោម៖

ស្វែងយល់ពីនិយមន័យនៃភាពជាអ្នកដឹកនាំ និងអាចកំណត់បាននូវភាពខុសគ្នារវាង ការដឹកនាំ និង ការគ្រប់គ្រង ។
យល់ពីសារៈសំខាន់នៃការជឿជាក់មួយចំនួនដែលអាចជួយលើកកម្ពស់ភាពជាអ្នកដឹកនាំ ។
មានសមត្ថភាពអាចអនុវត្តបាននូវការជឿជាក់បួនគឺ ចក្ខុវិស័យ, ការបង្ហាញមុខ ,ទំនាក់ទំនង និងការសិក្សា។
មានសមត្ថភាពកសាងអាំងឌីកាទ័រ និងវិភាគអាំងឌីកាទ័រ ។
មានសមត្ថភាពជំរុញឱ្យសហគមន៍ចូលរួមពេញលេញក្នុងការជួយកុមារឱ្យរៀនបានល្អ ។
អាចធ្វើផែនការអភិវឌ្ឍសាលារៀនដោយផ្អែកលើចក្ខុវិស័យ និងអាំងឌីកាទ័រ ។

សិក្ខាកាមនឹងយកចំណេះដឹងល្អៗទៅរៀបចំធ្វើផែនការអភិវឌ្ឍសាលារៀន និងបង្កើតផែនការសកម្មភាពសម្រាប់ការដឹកនាំ និងគ្រប់គ្រងសាលារៀនឱ្យមានភាពរីកចម្រើនលូតលាស់ ជាពិសេសនាយកសាលារៀនគោលដៅទាំងអស់នឹងទទួលបានការបណ្តុះបណ្តាលភាពជាអ្នកដឹកនាំជាបន្តបន្ទាប់ដើម្បីជួយឱ្យពួកគាត់ធ្វើការងារកាន់តែជិតស្និទ្ធជាមួយសហគមន៍មូលដ្ឋាន៕